Moción sobre a situación do servizo do centro médico de Dena

O PLENO  DO CONCELLO DE MEAÑO

O Grupo Municipal Socialista (PsdeG-PSOE) no Concello de Meaño a través do seu voceiro Manuel Radío Oubiña e ó abeiro do disposto nos artigos 91.4 e 97 do Regulamento de Organización, Funcionamento e Réxime Xurídico das Entidades Locais (Real Decreto 2568/1986) presenta ante o Pleno da Corporación Municipal a seguinte 

MOCIÓN, REFERIDA Á SITUACIÓN DO SERVIZO DO CENTRO MÉDICO DE DENA

Unha atención primaria (centros médicos) fortalecida supón unha maior capacidade de funcionamento da rede de hospitais, que ven menos saturadas as súas propias dinámicas de funcionamento, dende a redución de entradas en urxencias ata a optimización de tempos e de diminución de listas de espera.

Non obstante, no concello de Meaño a atención primaria sanitaria vén sufrindo a desatención por parte da dirección da Estrutura Organizada de Xestión Integrada (EOXI) de Pontevedra e, por extensión, da Consellería de Sanidade. Xa nas pasadas datas de Nadal o centro sufría problemas de saturación, non resoltos pola consellería, e que provocaron a sobrecarga sobre os profesionais.

En recentes datas, estivemos sufrindo novos problemas. Os dous profesionais do centro de saúde de Meaño están realizando a atención aos pacientes asignados á consulta de Dena, que está agora mesmo sen médica que a atenda, xa que non se cubre a ausencia da facultativa propietaria da praza.

Ante esta situación, os pacientes están sendo derivados ao centro de Meaño que, efectivamente, ábrese pola tarde pero sen maior dotación de profesionais, o que supón unha sobrecarga para os facultativos, dobrando a súa xornada laboral, mañá e tarde.

Deste xeito, a EOXI pretende realizar un acto discriminatorio, adoptando a idea de pechar o servizo que está a realizar o centro médico de Dena. Isto suporía unha sobrecarga de pacientes para o outro centro médico de Meaño, que non conta con suficiente persoal, nin recursos, nin espazo para a atención primaria dos veciños do noso concello.

De acordo con todo o anterior, sómetese á consideración do Pleno da Corporación á aprobación a seguinte:

PROPOSTA DE ACORDO:

 1- Instar á Consellería de Sanidade a que dote o centro médico de Dena dun facultativo durante os meses de verán, nos que o servizo non se está a efectuar, pola ausencia da súa profesional.

2- Solicitar á Estrutura Organizada de Xestión Integrada (EOXI) de Pontevedra que adopten as medidas necesarias para non pechar un servizo necesario desenvolto no centro médico de Dena para a poboación de Meaño.

En Meaño, a 17 de xullo do 2019

Asdo: Manuel Radío Oubiña

(Voceiro do PSdeG-PSOE)

SR.ALCALDE-PRESIDENTE DO EXCMO CONCELLO DE MEAÑO